Тарых музейиндеги миллион сомдук "аттар", 100 миң сомдук отургучтар (фоторепортаж)

25-майда Жогорку Кеңештин "Ата Мекен" фракциясы Тарых музейинин курулушу боюнча көчмө жыйын өткөрдү. Жыйын учурунда музейдин курулушуна жана сатылып алынган эмеректерге кеткен баалар боюнча маалыматтар берилди.

Маалыматка ылайык, Тарых музейи эки этап менен оңдоодон өткөн. Биринчи этабында музейдин сырты оңдолсо, экинчи этабында ичи оңдолгон. Каржы министрлигинин маалыматына караганда, ага мамлекеттик бюджеттен жалпы 1,5 миллиард сом бөлүнүп берилген.

Депутат Каныбек Иманалиев келишимдин негизинде музейге гранттык каражатты жумшоодон баш тартып, республикалык бюджеттен 1,5 миллиард сом бөлүү чечимине ким кол койгондугун тактоо керектигин билдирди. Башка депутаттар куруу, сатып алуу иштери тендерсиз өткөндүгүн белгилеп, ага ким уруксат бергенин аныктап чыгуу үчүн фракциянын протоколдук тапшырмасына өз сунуштарын беришти.

Жыйынтыгында айтылган фактыларды бир айдын ичинде иликтөө үчүн укук коргоо органдарына 6 пункттан турган тапшырмаларды берүү боюнча чечим кабыл алынды.

Аталган музей 2016-жылдын 25-мартында жабылып, оңдоо иштери башталган.