Ысык-Көлдө жеңеси тарабынан сабалган 2 жаштагы бала ооруканадан үйгө чыгарылды

Ысык-Көл облусунун Балыкчы шаарында жеңеси тарабынан сабалып ооруканага түшкөн 2 жаштагы бала үйгө чыгарылды. Бул тууралуу Эмгек жана социалдык өнүгүү министрлигинин басма сөз кызматы маалымдады.

Маалыматка ылайык, баланын абалы канааттандырарлык болгондуктан, ал үйүнө чыгарылган. Учурда сабалган бала атасынын жакын туугандарынын үйүндө апасы менен жашап жатат. Ошондой эле жабыр тарткан үй-бүлөгө социалдык жана психологиялык жардам көрсөтүлүп жатканы айтылат маалыматта.

Ал эми баланы ур-токмокко алган 33 жаштагы Г.Ч. аттуу келинге жана анын баласы А.Ж.га карата тергөө иштери жүрүп, Ысык-Көл ОИИБи кылмыш ишин козгоду.

Эске салсак, 27-май күнү Ысык-Көл облусунун Балыкчы шаарынын аймактык ооруканасына 2 жаштагы наристе катуу сабалган абалда келип түшкөн. Ыкчам иликтөө иштеринин натыйжасында бала жеңеси тарабынан сабалганы аныкталган.