Таң эрте катарга тизилген эл, кечиримдүүлүккө, сабырдуулукка чакырган баяндар. Бишкектеги Айт намаздан фоторепортаж

Бүгүн, 15-июнда өлкөдө Орозо айт майрамында Айт намазы окулду. Шаар тургундары эски аянтка таңкы саат 05:30да келе баштады. Милиция күчөтүлгөн тартипте иш алып барып, ар бир жаранды атайын жабдуу менен дыкат текшерип жатты.

Намаз башталганга чейин эле эл аянтка батпай, көчөлөрдөн орун ала башташты. Намазга жыгылуу саат 07:30да башталды. Бул убакка чейин дин аалымдары баян айтышты. Саат 07:15те Жогорку Кеңештин төрагасы Дастанбек Жумабеков алгач президент Сооронбай Жээнбековдун куттуктоосун окуп берип, андан кийин өзүнүн атынан сүйлөдү. Андан соң шаар башчысы Албек Ибраимов сөз сүйлөп, муфтий Максатбек Токтомушев баян айтып, элди кечиримдүү болууга чакырды.

"Бирөөнүн укугун тебелеп жашабайлы, бирөөгө жамандык кылбай жашайлы, жылдын калган 11 айында дагы Орозо айында жашагандай жашайлы. Сабырдуу, кечиримдүү бололу", - деди муфтий.

Аянтка батпагандар бактын арасы, жолдорго чейин тизилип намазга жыгылышты.
Айт намаз саат 08:01де аяктап, намазга келгендер бири-бирин куттукташты. Алдыңкы катардагылар муфтий менен кол алышып учурашты.

Аянтка орто эсеп менен алганда 30 миңден ашык адам келди. 1 жарым миңден ашык милиция кызматкери коопсуздукту көзөмөлдөштү.