Бишкек шаардык кеңешиндеги фракциялардын аттары жазылган куурчактарды митингчилер таштандыга ыргытып кетишти

Бүгүн, 8-августта Бишкекте шаар мэрин шайлоо өттү. Буга байланыштуу мэриянын алдында жарандык активисттер митингге чыгышты. Ага катышкан Асия Сасыкбаева шаардык кеңештин депутаттары таркап кетишсе, мамлекетке эч зыян болбойт деген пикирин айтты.

Ал: "Балким, кайра жакшы болот. Ал жерге олигархтардын балдары, курулушчулар топтолуп калган. Алар маселени өз кызыкчылыгы үчүн чечкенге умтулушат да. Эми мына альтернативи жок бир адамды мэр кылабыз деп жатышат. Жарандык активисттер мыйзамды бузбагыла деп чогулуп жатышат", - деди.

Чогулган активисттер ачык шайлоону көрүү үчүн мэриянын имаратына кирүүгө аракет кылышты. Равшан Жээнбеков ызы-чуу болуп кетишин эскерткенден кийин митингге келгендер атайын 7 делегатты тандашты. Бирок милиция кызматкерлери мэриянын имаратына кирип, шаардык кеңештин жыйынына катышам деген делегаттарды киргизген жок.

Чогулган жарандык активисттер колунда кармап турган куурчактарды жерге ыргытышты. Куурчактарда фракциялардын аталыштары менен кошо "Мамлекеттик тил комиссиясы", "Шаардык кеңештин депутаттары" деген жазуулар бар эле.

Андан соң "шаардык кеңештин депутаттары куурчак, алардын орду таштандыда" деп активисттер колундагы куурчактарды таштанды челекке таштап салышты.

Митингге чыккан жарандык активисттердин талаптары колундагы плакаттарда жазылган.
"Балдар аянтчалары курулушчулар үчүн эмес, балдар үчүн!"
"Бала бакчалардын имараттары балдарга берилсин!"
"Коррупцияга жол жок!
"Шаардагы башаламан курулушка жол жок!"
"Прокуратура, мыйзамдуулукту жана жарандарды корго!"
"Прокуратура, сейил бактагы жерлерди кайтар!"
"Мэрия, көп кабаттуу үйлөрдүн жер төлөлөрүн кайтар!"