Бишкектеги эт комбинаттагы өрт дале өчө элек

Бишкектеги эт комбинаттан 9-август күнү түн ичинде чыккан өрт дале өчө элек. Бул тууралуу Өзгөчө кырдаалдар министрлигинен кабарлашты. Мекеменин басма сөз кызматынын өкүлү Ыкыбал Абдираимованын SUPER.KG'ге 10-августта кабарлашынча, учурда аталган жайда эки өрт өчүрүү тобу иштеп жатат.

"Жалпы жонунан өрт толук өчүрүлүп бүтө элек. Учурда эки топ өрт өчүрүү шатысы менен имараттын дубалдарынан чыккан түтүндөрдү толук өчүрүү аракетин көрүп жатат. Анткени дубалдарга чапталган пенопласт түтөп жатат. Өрт өчүрүү дагы канча саатка созула турганы азырынча белгисиз. Тилсиз жоонун кесепетинен имараттын жалпы 5 миң чарчы метр аянты күйүп кеткен", - деди Абдираимова.

Москва жана Фучик көчөлөрүнүн кесилишинде жайгашкан 5 кабаттуу эт комбинатынан 9-августка караган түнү өрт чыгып, тилсиз жоо тууралуу маалымат ӨКМга саат 4:53тө келип түшкөн. Айтылган дарекке жалпы 5 өрт өчүрүү тобу тартылган.