Башкы штаб: "Бир колунан ажыраган жоокер тыюу салынган белгилерге карабай трансформаторго кирип, токко тартылган"

Жалал-Абад облусунун Майлуу-Суу шаарындагы №30295-аскердик бөлүктө 22 жаштагы Руслан Сапарбаев аттуу жоокер токко урунуп, бир колунан айрылган. Бул боюнча Башкы штаб SUPER.KG'ге 22-августта түшүндүрмө берди. Мекеменин басма сөз кызматынын маалыматына ылайык, жоокер тыюу салынган белгилерге карабай электр көмөк чордонунун аймагына кирип, токко тартылган. Натыйжада эки колунун учтары күйүп кеткен.

"Кызматтык иликтөөнүн алдын ала маалыматына караганда, 1996-жылы туулган Р.С. аттуу жоокер бир күндүк нөөмөт учурунда электр көмөк чордонунун аймагына кирип алган. Тыюу салынган белгилерге карабай кирип кетип, трансформаторго кирип, токко тартылган. Натыйжада жоокер эки колунан жаракат алып, Майлуу-Суу шаарындагы ооруканага, андан кийин Ош шаарындагы ооруканага жеткирилген. Кийинчерээк Бишкектеги Травматология жана ортопедия борборуна которулган. Ал жерде оң колунун чыканагына чейинки бөлүгү ампутацияланган. Учурда жоокер бардык керектүү медициналык жардамдарды алууда. Андан сырткары иликтөөнүн материалдары Жалал-Абад гарнизонунун Аскер прокуратурасына жиберилди", - деп билдиришти штабдан.

Жоокердин жеңеси Венера Өмүралиева 21-августта кайрылып, ал иштебей турган электр щитине уялап алган чымчыктын жерге түшүп калган жумурткасын кайра ордуна коюп коюуга аракет кылып жатканда кырсыкка кабылганын айткан. Ошондой эле жоокер кыйынчылыкта жашаган жалгыз бой эненин жалгыз уулу экенин кошумчалаган.