Ош мэриясы: "Мэр чатырдын алдында отурганына карата айтылган сындарды туура кабыл алды"

Ош шаарынын борбордук аянтында облус башчысы Узарбек Жылкыбаев менен мэр Таалайбек Сарыбашовдун эгемендүүлүктүн 27 жылдыгына арналган салтанат учурунда чатыр алдында отурганы тартылган сүрөт социалдык тармактарда сынга кабылды. Мэрдин басма сөз катчысы Азамат Абсаттаров Сарыбашов айтылган сындарды туура кабыл алганын SUPER.KG'ге айтып берди. Анын айтымында, мэр кандай жерге отура турганы боюнча алдын ала кабары болгон эмес.

"Шаар башчысы өзү ар дайым интернет басылмаларына чыккан маалыматтарды окуп турат. Бүгүн өзүнүн дарегине айтылган сындар боюнча да кабары бар экен. Мени кабыл алып, айтылган сындарды туура кабыл алганын айтты. Ошол эле учурда мэр президент Сооронбай Жээнбековдун үстүндө чатыры жок отурганына салыштырып жаткан сүрөттү көрдү. Чынында, президент үлгү көрсөтүптүр. Мэр деле "үстүмө чатыр коюп, астыма килем салгыла" деп эч кимге тапшырма берген эмес. Иш-чаранын программасы менен гана алек болуп жүрүп, кандай жерге отура турганы боюнча алдын ала кабары болгон эмес. Ошондуктан үстүнө коюлган чатыр жагыныш максатында коюлган эмес, буга чейинки өткөн иш чаралардын баарына коюлуп келген", - деди Абсаттаров.