SUPER TV: Балдакчан баатыр кыз: "Инимдин операциясы үчүн ишкерликке кириштим"

Саламат Бактыбек кызы аттуу балдакчан баатыр кыз бир бутунан ажыраган. Ошондой эле тагдыр анын жаш экенине, ден соолугунун мүмкүнчүлүгү чектелгенине карабай апасынан да ажыратат. Жашоонун соккуларына жеңилбеген кыз алдыга кадам таштагандан тажабай, жаркын келечекке ишенип келет. Өп-чап турмушту башынан кечирип, өз ара ишкерликке киришкен каарманыбыз буга эмне түрткү болгонун айтып берди.

"Буга чейин ар кандай жумуш издеп көрдүм. Бирок кээ бири жакшы кабыл алса, айрымдары мага ылайыктуу жумуш жок экенин айтышчу. Мындан улам эч кимге көз карандысыз болгон жумушта иштесем, өз алдымча ишкерлик кылсам деп кыялдана берчүмүн. Анын үстүнө бир тууган иним нышан болуп төрөлгөндүктөн келбетинен намыстана берет. Акча чогултуп, ага операция жасатып берсем деген ниетим бар. Ушул нерсе да ишкерлик менен алектенүүгө түрткү болуп, өзүм гүл жасап сата баштадым", - дейт ал.

Ошондой эле бирде жылмайып, бирде көзүнө жаш алып сүйлөгөн дилгир кыз каражаттын жетишсиздигинен улам инисин окутуп, өзү мектептен кийин билим албай калганын кошумчалады.

Кыйынчылыктын баарын жылмаюу менен гана жеңген жаш кол өнөрчүнүн видеосун төмөндөгү сюжеттен көрө аласыздар.