Бишкекте окуучулар мушташып, 9-класстын окуучусу каза болду

Бишкекте мектеп окуучуларынын ортосунда мушташ чыгып, 1 окуучу каза болду. Бул тууралуу кабарды Бишкек ШИИББинин басма сөз кызматы тастыктап, маалымат таратты.

Маалыматта белгилүү болгондой, окуя 28-майга караган түнү борбор калаада орун алган.

"Түн ичинде №3 шаардык балдар ооруканасына "Тез жардам" кызматы денесинен ар кандай жаракаттарды алган окуучу баланы алып барган. Милиция кызматына дарыгерлер чалып кабарлашкан. Жерине ыкчам топ барып, иликтөө жүргүздү.

Алгачкы маалыматтарга караганда, шаардагы мектептердин биринин жанында 27-май күнү окуучулар арасында жаңжал чыккан. Окуянын негизинде "Ден соолукка оор залал келтирүү" беренеси менен сотко чейинки иликтөө башталды. Тиешелүү экспертизалар дайындалып, мушташтын башка катышуучулары изделип жатат. Окуучу ооруканада таңга маал каза болгон. Ал №48 мектептин 9-классынын окуучусу, 16 жашта болгон", - деп билдирет басма сөз кызматы.