Таласта каза болгон кош бойлуу келин. Министрликтин версиясы

Талас облусунун Кара-Буура районунда каза болгон кош бойлуу келиндин өлүмү "күтүлбөгөн жерден өлүм синдрому" деп катталган. Ал ооруканага келгенде оорлошуп жана бир колу эч нерсе сезбей жатканын айтты. Бул тууралуу бүгүн, 7-июнда SUPER.KG порталына Саламаттыкты сактоо министрлигинен билдиришти.

Маалыматка ылайык, 1991-жылы туулган А.А. аттуу кош бойлуу 27-апрель күнү "Чымкент" №5 үй-бүлөлүк дарыгерлер тобуна каттоого алынган. Ал эми кош бойлуулугунун 32-жумасына чейин Бишкек шаарында каттоодо болгон.

"Кош бойлуу келин Кара-Буура районуна каттоого алынганда тиешелүү анализдерди тапшырган. Анын жыйынтыгы боюнча баары нормадан ашыкча эмес экени аныкталган. Окуя болгон күнү 3-июнда саат 9:00дө №5 үй-бүлөлүк дарыгерлер борборуна келип, эпигастралдык ооруга даттанган. Мындан улам ал күйөөсүнүн жана медайымдын коштоосунда Кара-Бууранын райондук үй-бүлөлүк дарыгерлер борборуна жөнөтүлгөн. Ал жактан кош бойлуу ультра добуштуу изилдөөгө кирип, баланын жүрөк согуусу жана кыймылы нормада экени аныкталган. Дарыгердин "өзүңдү кандай сезип жатасың?" деген суроосуна ал оң колу уктап, сезбей жатканын жана өзүн оор сезип жатканын айткан. Дарыгерлер андан кан алып текшеришкен. Кийин келин коридорго чыгып, басып баратып эс-учун жоготкон. Бейтапкананын кызматкерлери дароо сүйрөгүчкө салып жандандыруу бөлүмүнө жеткиришкен. 25 мүнөт бою дарыгерлер өмүрүн сактап калууга аракет жасашкан. Бирок келиндин каза болуп калганы аныкталган", - дешти министрликтен.

Белгилүү болгондой, маркумдун жакындары соттук-медициналык экспертиза өткөрүүдөн баш тартышкан. Бул факт 38 жума кош бойлуулук, күтүлбөгөн жерден өлүм синдрому деп катталган.