Жалал-Абад шаарындагы түнкү клубдун жанында болгон мушташта сабалган 26 жаштагы жаран каза болду

9-сентябрь күнү Жалал-Абад шаарындагы түнкү клубдун жанында болгон мушташта сабалган 26 жаштагы жаран каза болду. Бул тууралуу облустук милициядан билдиришти.

Маалыматка ылайык, жабырлануучу бүгүн, 13-сентябрь күнү саат 10:00 чамасында каза болгон.

Алдын ала маалыматтар боюнча, маркум үй-бүлөдө 3 бир туугандын ортончусу болгон. Эжеси жана карындашы бар.

Окуянын чоо-жайы:

9-сентябрь күнү саат 23:30 чамасында Жалал-Абад шаарынын «Дина» түнкү клубунун жанында мушташ болгон. Базар-Коргон районунун тургуну 1993-жылы туулган Б.М.ди өзүнө бейтааныш балдар пикир келишпестиктен улам зомбулук көрсөтүп, уруп коюшкан. Натыйжада Б.М. денесинен жараат алып, Жалал-Абад облустук клиникалык ооруканасынын жандандыруу бөлүмүнө жаткырылган.

Учурда бул факты боюнча Сузак районунун 4 жараны шектүү катары кармалып, убактылуу кармоочу жайына киргизилген.