3 жыл мектепте иштеген 23 жаштагы мугалим "Билим берүүнүн мыктысы" төш белгисин алды. Коомчулуктун сынына министрлик эмне дейт?

Мугалимдердин кесиптик майрамында 23 жаштагы жаш окутуучунун "Билим берүүнүн мыктысы" деген төш белгини алганы социалдык тармактарда талкуу жаратты. 3 жылдык тажрыйбасынан кийин мындай сыйлыкка ээ болгон мугалим Бактыгүл Жапар кызы Ош шаарындагы №50 Паиз Нышанов атындагы мектепте география сабагынан окута тургандыгы белгилүү болду. Ал Ош мамлекеттик университетин бүтүргөн. Билим берүү жана илим министри Каныбек Исаков буга чейин аталган окуу жайда ректор болуп иштегендиктен, ал экөөнүн тааныштыгы бар деген божомолдор айтылып жатты. Көбү 3 жылдык эмгек менен төш белгиге ээ болуу жөн жерден эмес деген пикирлерин жазып жатышты.

Бул боюнча Билим берүү жана илим министрлиги Бактыгүл Жапар кызы менен министрдин эч кандай тааныштыгы жок экендигин маалымдады.

"Каныбек Исаков менен ал мугалимдин эч кандай тууганчылык жайы жок. Сөз болуп жаткан Бактыгүл Жапар кызы билим Берүү жана илим министрлигинин сыйлыктар жөнүндөгү жобосунун негизинде, мыйзамдуу түрдө аталган төш белгиге татыган.

2018-жылдын 12-февралындагы №157/1 буйрук менен бекитилген ведомстволук сыйлыктары жөнүндөгү жобосунун 7-пунктуна (Сыйлыкка көрсөтүүдө комиссиянын өзгөчө учурларда кароо тартиби жөнүндө) ылайык, Билим берүү жана илим министрлигинин ведомстволук сыйлыктар боюнча комиссиясы өзгөчө учурларда министрликтин Ардак грамотасы менен сыйланбаган адамды: республикалык “Жыл мугалими” сынагынын, мугалимдердин республикалык жана эл аралык масштабдагы өткөрүлгөн сынактарынын 1-2-3-орундун жеңүүчүлөрүн, окуучулары республикалык жана эл аралык олимпиадалардан, дүйнөлүк жана Азия оюндарынын жеңүүчүсү деп табылган мугалимдер, республикалык же көз карандысыз рейтингдерде алдыңкы катарга чыккан кызматкерлер, билим берүү тармагынын өсүп-өнүгүшүнө, материалдык-техникалык базасын чыңдоого, жогорку көрсөткүчтөргө жетишкендиги үчүн “Билим берүүнүн мыктысы” төш белгиси жана Ардак грамота менен сыйлоого укуктуу.

№50 Паиз Нышанов атындагы мектебинин география мугалими Ош шаарында өткөрүлгөн “Жылдын мыкты мугалими 2019” конкурсунун жеңүүчүсү болгондугуна байланыштуу Ош шаардык билим берүү башкармалыгынын сунушунун негизинде “Билим берүүнүн мыктысы” төш белгиси менен сыйланды", - деп айтылат министрликтин маалыматында.

Ал эми Бактыгүл Жапар кызы анын сыйлык алуусу боюнча каршы пикир айткандарга төмөндөгүдөй жообун узатты.

"Мен география мугалими катары 3 жылдан бери эмгектенип келем. Бюджеттик негизде жогорку окуу жайын аяктагандыгыма байланыштуу келишим боюнча 3 жыл иштеп беришим керек жана андан кийин да педагогикалык ишмердүүлүгүмдү улантайын деген чоң максатым бар.

Мектепке келгенге чейин да жогорку окуу жайында кайсы бир деңгээлде ийгиликтерди жаратып, тийиштүү сыйлыктар берилип келген. Мектепке жаңыдан келген жылы Ош шаардык билим берүү башкармалыгы тарабынан өткөрүлгөн мугалимдердин диагностикалык аттестациясында өзүмдүн предметим боюнча шаарыбызда алдыңкы орунду ээлеп, грамота менен сыйлангам. Муну менен катар өткөн жылы уюштурулган мугалимдердин сынагында баш байгенин ээси болуп, башкармалыгыбыздын Ардак грамотасы жана Кубок менен сыйлангам. Муну менен катар Ош шаарынын мэриясынын сыйлыгы, Ош шаардык кеңешинин, Билим берүү жана илим министрлигинин Ардак грамоталары, Жогорку Кеңештин ыраазычылык баракчасы менен да сыйлангам. Бирок ушул сыйлыктардын бирөөсүнө да өзүмдү сунуштап, тааныш салып, жүгүргөн эмесмин.
Фейк аккаунт же башка фейк маалымат булактары аркылуу интернетте жазылып жаткандай, жаңы дайындалган билим берүү жана илим министри Исаков менен эч кандай тааныштыгым жок, болгону мен ал иштеп кеткен ОшМУда окугам. Ал менин "күнөөм" болбосо керек. Каныбек Исаковду мен ректорубуз катары, ал эми учурда билим берүү жана илим министри катары гана тааныйм. Сыйлыкты алууда жаш курагым тоскоол болсо, анда айла жок. А мен нормалдуу ойлонгон киши катары, өзүмдү бир да сыйлыкка сунуштаган эмесмин, сунушталып келемин, бардык сыйлык мен үчүн күтүүсүз болуп келген. Ишенимди мындан ары да актаганга бүт аракетимди жумшайм", - деп билдирет ал.