Жамал Сейдакматова: "Бир арманым Болот Шамшиевдин артында окуучулары калбаганы болуп турат"

Атактуу режиссёр Болот Шамшиевди акыркы сапарга узатуу зыйнатына катышып жаткан Кыргыз өлкөсүнүн театр жана кино искусствосунун чебери, белгилүү актриса Жамал Сейдакматова көзүнө жаш алып, Шамшиев тууралуу төмөнкүлөргө токтолду.

Анын айтымында, Шамшиевдин талантын кыргыз эли толук пайдалана алган жок. Ал улуу таланттын артында шакирттери калбаганын айтып, каңырыгы түтөп турду.

"Бүгүн биз кыргыздын чыгаан, эң бийик, гений уулун акыркы сапарга узатуу зыйнатына катышып жатабыз. Болот Шамшиевдин чыгармалары дүйнөнүн 48 өлкөсүндө коюлган. Шамшиевдин чыгармаларынын деңгээлиндеги чыгарма азыркы учурда тартыла элек.

Кыргыздын кереметин жараткан авторлордон кыргызда экөө болсо, анын бирөө Шамшиев болчу. Менин бир арманым Болоттун окуучулары калбаганы болуп турат. Улуу таланттын артында шакирттери калса жакшы болмок. Өзү дагы кичине арманда кетти. Анткени акыркы жылдары такыр кино тартпай калды эле. Ал жөнүндө айтсам көп сөз болот.

"Ак кемесин", "Караш карашын" ушул убакытка чейин казактар "мыкты кино" деп айтышат экен. Бул киши акылдуу, ойчул, кыргыздын асмандагы жылдызы болчу. Акыркы керээзи "Мен каза болгондо Манасты жаңыртып койгула" деген экен. Бүгүн улуу дастан анын урматына жаңырып жатат", - деди ал.