Баткенде миңден ашуун жаран борбордук аянттагы Жаңы жыл майрамына күбө болушту

31-декабрда Баткен шаарынын борбордук аянтына орнотулган балатынын жанында салтанаттуу жаңы жылдык кече белгиленди. Баткен шаардык мэриясынын маалымат кызматынан билдиргендей, борбордук аянтка миңден ашуун тургундар келген.

"Жергиликтүү жашоочулар балатынын жанынан сүрөткө түшүштү. Мындан тышкары, алар концерттик программага, оюн-зоокторго жана жергиликтүү артисттер тарабынан даярдалган жаңы жылдык жомокко күбө болушту", - дейт басма сөз кызматынан.

Иш-чарага шаар мэри Мамыржан Рахимов, шаардык кеңештин төрагасы Алмазбек Ташбеков, жергиликтүү бийлик өкүлдөрү катышты.

"Сапары карып бара жаткан жылдагы ийгилигибиз бул - өлкөбүздүн тынчтыгы, элибиздин биримдиги, ынтымагы болуп саналат. Кирип келген Жаңы жыл өлкөдө, анын ичинде Баткен шаарында тынчтыктын, ынтымактын, биримдиктин, токчулуктун, молчулуктун жылы болсун! Жаңы жылыңыздар кут болсун!", - деп куттуктады мэр Рахимов.