Бишкекте короолордун биринде мушташкандар кармалышты (видео)

Бишкекте короолордун биринде кошуналары менен мушташкан эки эргул кармалды. Бул тууралуу шаардык милиция билдирди.

Маалым болгондой, окуя кечээ, 8-май саат 23:00 чамасында Орозбеков көчөсүндөгү үйлөрдүн биринин короосунда болду. Свердлов райондук ички иштер башкармалыгынын кызматкерлери жерине барып, окуяга тиешеси бар жарандарды тергөөгө алып келди. Кармалган жарандар спирт ичимдигин ичкен абалда болушкан.

Учурда 1999-жылы туулган Ж.У. жана Э.И. аттуу жарандарга карата Укук бузуулар жөнүндө кодексинин 126-беренесинин (Майда бейбаштык) негизинде административдик протоколдор түзүлдү. Алар убактылуу кармоочу жайга киргизилди.

Ошондой эле башка жарандардын арыздарынын негизинде тиешелүү соттук-медициналык экспертизалар дайындалды. Жыйынтыгы менен юридикалык баа берилип, анын ичинде кылмыш ишин козгоо маселеси дагы каралат.

Тергөө иштери уланууда.