Трамп Иранга жаңы соккулар болушу мүмкүн экенин билдирди

АКШнын президенти Дональд Трамп Ирандагы электр станцияларына жана көпүрөлөргө жаңы сокку урууга буйрук берүү чечимине жакындап калганын билдирди.

Бул тууралуу америкалык Fox News телеканалынын кабарчысы Трей Йингст президент менен болгон телефондук сүйлөшүүдөн кийин маалымдагандыгын чет элдик басылмалар жазышты.

Анын айтымында, Трамп Ирандагы электр станциялары менен көпүрөлөргө карата жаңы аскердик соккуларды жасоо боюнча буйрук берүүгө аз калганын айткан.

Буга чейин Трамп өзүнүн Truth Social баракчасында Иран сүйлөшүү процессин создуктуруп жатат деген пикирин билдирип, бул үчүн өлкө “баасын төлөй турганын” жазган.

Азырынча АКШ тараптан мүмкүн болгон соккулардын мөөнөтү же масштабы тууралуу расмий маалымат жарыялана элек. Бирок бул билдирүү Вашингтон менен Тегерандын ортосундагы чыңалуунун күчөп жатканын көрсөтүүдө.