Чолпон-Атада Садыр Жапаров менен Асиф Али Зардаринин жолугушуусу өттү

Бүгүн, 7-июлда Чолпон-Ата шаарында президент Садыр Жапаров менен Пакистандын президенти Асиф Али Зардаринин расмий жолугушуу аземи болуп өттү.

“Рух-Ордо” маданий борборунда Кыргызстан жана Пакистандын мамлекеттик туулары илинип, Ардак кароол тизилип, 40 этно-жоокер катышты.

Өз ара саламдашуудан кийин лидерлер Ардак кароол ротасынын командиринин рапортун кабыл алышып, эки өлкөнүн мамлекеттик гимндери жаңырды. Андан соң мамлекет башчылары Ардак кароолдун катарын кыдырып, лидерлер расмий делегациялардын мүчөлөрү менен таанышты.

Андан кийин Садыр Жапаров менен Асиф Али Зардари протоколдук сүрөткө түшүү жана кызматташтык маселелерин талкуулоо үчүн №2 мамлекеттик резиденциянын Конгресс-холлуна өтүштү.