Эми президентке Tunduk тиркемеси аркылуу онлайн кайрылууга болот

"Tүндүк" ААКсы Tunduk мобилдик тиркемесинде жаңы кызмат ишке киргизилгенин билдирди. Эми жарандар президенттин администрациясына расмий кайрылууларын кагаз жүзүндө тапшырбай эле, электрондук форматта жөнөтө алышат.

Маалыматка ылайык, жаңы кызмат мамлекеттик башкарууну санариптештирүү саясатынын алкагында ишке ашырылып, жарандардын мамлекеттик органдар менен байланышын жеңилдетүүгө багытталган.

Кызматты колдонуу үчүн Tunduk тиркемесине авторизациядан өтүп, башкы беттеги "Президентке кайрылуу" бөлүмүн тандоо керек. Андан соң кайрылуунун негизги маалыматтарын толтуруп, темасын жана мазмунун жазып, зарыл болсо кошумча документтерди тиркеп, социалдык макамын жана документтин түрүн көрсөтүү жетиштүү.

Кайрылуу булуттук электрондук кол тамга менен тастыкталып, документтин юридикалык күчү камсыздалат. Ошондой эле система кайрылууну автоматтык түрдө президенттин администрациясына жөнөтөт.

"Tүндүк" ААКсынын маалыматына караганда, жаңы кызмат жарандарга өлкөнүн каалаган жеринен бир нече мүнөттүн ичинде кайрылуу жөнөтүүгө шарт түзөт. Мындан тышкары кабылдамага жеке баруунун же почта кызматын колдонуунун зарылдыгы болбойт, ал эми электрондук кол тамга жеке маалыматтардын коопсуздугун жана документтин юридикалык күчүн камсыздайт.

Мекеменин билдиришинче, бул сервис мамлекеттик башкарууну санариптештирүүнүн маанилүү кадамдарынын бири болуп, жарандардын мамлекеттик башкарууга катышуусун кеңейтүүгө, административдик чыгымдарды кыскартууга жана кайрылууларды кароо процессинин ачыктыгын жогорулатууга багытталган.