Өлкөдө спорттун жаңы түрлөрүн улуттук реестрге киргизүү маселеси талкууланды

Бүгүн, 7-июлда Дене тарбия жана спорт мамлекеттик агенттигинде директордун орун басары Болотбек Ашыралиевдин төрагалыгы алдында Спорттун жана спорттук дисциплиналардын улуттук реестрине жаңы спорт түрлөрүн киргизүү боюнча комиссиянын жыйыны өттү. Бул тууралуу аталган агенттиктен билдиришти.

Маалыматка ылайык, жыйындын жүрүшүндө өлкөдө өнүгүп жаткан төмөнкү спорт түрлөрүн улуттук реестрге киргизүү маселеси каралды:

* кикбоксинг (ISKA);
* IMMAF (аралаш мушташ өнөрү);
* чүкө оюндары;
* суу-мотор спорту;
* алп-таймаш;
* ссирым (корей улуттук күрөшү).

Тийиштүү федерациялардын өкүлдөрү өздөрүнүн ишмердүүлүгү, мелдештерди өткөрүү тажрыйбасы, өнөктөштөр менен кызматташтыгы тууралуу маалымат берип, спорттун аталган түрлөрүн мындан ары өнүктүрүүнүн артыкчылыктуу багыттарын белгилешти.

Комиссиянын жыйыны өлкөдө өнүгүп жаткан спорттун түрлөрүн системалаштыруу, эсепке алуу жана алардын расмий макамын бекемдөө максатында өткөрүлдү.