Садыр Жапаров менен Асиф Али Зардари Ысык-Көлдө этномаданий программа менен таанышты

Президент Садыр Жапаров жана Пакистан Ислам Республикасынын президенти Асиф Али Зардари 7-июлда Кыргыз Республикасына болгон расмий сапардын алкагында Ысык-Көл облусунун Бостери айылындагы “Номад” амфитеатрында уюштурулган этномаданий программага катышты. Бул тууралуу президенттин администрациясынан билдиришти.

Маалыматка ылайык, мамлекет башчыларын салбуурун өнөрүнүн өкүлдөрү тайгандар жана алгыр куштар менен тосуп алышты. Андан соң төкмө акындар кыргыз элинин музыкалык жана поэтикалык мурасын тартуулашты.

Лидерлер көчмөндөрдүн маданиятын жана турмушун чагылдырган кол өнөрчүлүк устаканалары, боз үйдүн ички жасалгасы жана башка тематикалык инсталляциялар менен таанышты. Иш-чаранын жүрүшүндө Садыр Жапаров Пакистан Президенти Асиф Али Зардариге улуттук баш кийим — ак калпак белек кылды.

Этномаданий программа жаа атуу, атчан каскадёрлордун өнөрү, алгыр куштар менен аңчылык жана тайгандардын жарышы сыяктуу улуттук оюн-зооктор менен жыйынтыкталды.