Баткенде 10 миң орундуу стадиондун курулушу 60 пайызга аяктады

Баткен шаарында курулуп жаткан 10 миң орундуу стадиондун курулуш иштеринин 60 пайызы бүткөрүлдү. Бул тууралуу президенттин Баткен облусундагы ыйгарым укуктуу өкүлүнүн басма сөз кызматы билдирди.

Маалыматка ылайык, президенттин Баткен облусундагы ыйгарым укуктуу өкүлү Мамыржан Рахимов курулуштун жүрүшү менен таанышты. Учурда негизги курулуш иштери аяктап, объектти ушул жылдын октябрь айынын аягына чейин пайдаланууга берүү пландалууда.

Жалпы аянты 10 гектарды түзгөн спорт комплексинде футбол аренасынан тышкары үч машыгуу талаасы, төрт кичи футбол аянтчасы, 100 орундуу жатакана жана 200 унаага ылайыкталган унаа токтотуучу жай курулат.

Маалыматта белгиленгендей, стадион пайдаланууга берилгенден кийин облустук жана республикалык деңгээлдеги ири спорттук жана маданий иш-чараларды өткөрүүгө мүмкүнчүлүк түзүлөт.