Ак топоз кыргыз породасы болуп катталды

Ак түстөгү кыргыз топозу "Кыргыз ак топозу" аталышында жаңы порода катары расмий мамлекеттик каттоодон өттү. Бул тууралуу Айыл чарба министрлиги билдирди.

Маалымдалгандай, жаңы породаны каттоо жөнүндө буйрукка айыл чарба министри Эрлист Акунбеков кол койгон. "Кыргыз ак топозу" породасын түзүүдө коомдук ишмер Таштанбек Акматовдун эмгеги өзгөчө белгиленет. Анын ак топоздорду селекциялоо багытындагы көп жылдык эмгеги жаңы породанын калыптанышына чоң салым кошкон.

2014-2026-жылдары жүргүзүлгөн селекциялык иштердин натыйжасында бийик тоолуу шарттарга ыңгайлашкан, жогорку өндүрүмдүүлүккө ээ ак түстөгү топоздун жаңы породасы түзүлгөн.

"Кыргыз ак топозу" сапаттуу ак жүнү жана тыбыты менен айырмаланып, текстиль өнөр жайы үчүн баалуу чийки зат болуп саналат. Жаңы породанын мамлекеттик каттоодон өтүшү улуттук генетикалык ресурстарды сактоого, асыл тукум мал чарбасын өнүктүрүүгө, бийик тоолуу аймактардын туруктуу өнүгүшүнө жана Кыргызстандын агроөнөр жай комплексинин экспорттук мүмкүнчүлүктөрүн кеңейтүүгө өбөлгө түзөт",- деп айтылат маалыматта.