Караколдогу Пушкин атындагы борбордук сейил бактын реконструкциясы 85 пайызга аяктады

Каракол шаарындагы 100 жылдан ашуун тарыхы бар Пушкин атындагы борбордук сейил бакты реконструкциялоо иштери 85 пайызга аяктады. Бул тууралуу бүгүн, 21-июлда Курулуш, архитектура жана турак жай-коммуналдык чарба министрлиги билдирди.

Маалыматка ылайык, жалпы аянты 7,5 гектарды түзгөн сейил бакта 12 аттракциондун, административдик имараттын жана башка негизги объектилердин курулушу дээрлик бүткөрүлгөн.

Учурда аттракциондорду сыноодон өткөрүү, газон төшөө, автоматтык сугаруу системасын орнотуу, ошондой эле жөө адамдар жана велосипед жолдорун бүткөрүү иштери жүргүзүлүүдө.

Долбоордун алкагында заманбап фонтан, спорттук аянтчалар, амфитеатр, кафетерий жана эс алуучулар үчүн бардык шарттар түзүлөт.

Министрликтин маалыматына караганда, реконструкция толугу менен аяктагандан кийин Пушкин атындагы борбордук сейил бак Каракол шаарынын тургундары жана коноктору үчүн заманбап эс алуу жана көңүл ачуу жайына айланат.