Ошто короолордун биринде өспүрүмгө кол көтөрүүгө шектелген жаран камалды

Ош шаарында өспүрүмгө кол салуу фактысы боюнча кылмыш ишинин алкагында шектүү жаран камалды. Бул тууралуу Ош шаардык милициясы билдирди.

Милициянын маалыматына ылайык, окуя 21-июлда болгон. Эртеси күнү жабырлануучунун апасы милицияга арыз менен кайрылып, 2011-жылы туулган уулу белгисиз себептерден улам ур-токмокко алынганын билдирген.

Бул факт боюнча Кылмыш-жаза кодексинин 280-беренеси менен кылмыш иши козголуп, тергөө башталды. Окуя болгон жерге кароо жүргүзүлүп, жабырлануучу жана күбөлөр суракка алынышты. Ошондой эле өспүрүмдүн алган жаракаттарынын оордугун аныктоо үчүн соттук-медициналык экспертиза дайындалды.

Алдын ала маалыматтарга ылайык, жаңжал өспүрүмдөрдүн ортосундагы пикир келишпестиктен улам чыккан. Шектүү катары 1982-жылы туулган П. А. аттуу жаран кармалып, убактылуу кармоочу жайга киргизилди. Тергөө уланууда.

Буга чейин аталган окуянын видеосу интернет желесине тарап, коомчулуктун нааразычылыгын жараткан.