Си Цзиньпин чет өлкөдөгү кытайларды өлкөнүн өнүгүшүнө салым кошууга чакырды

Кечээ, 28-июлда Кытайдын төрагасы Си Цзиньпин Бээжинде өткөн чет өлкөдөгү кытайлар (хуацяо) менен иш алып баруу боюнча бүткүл кытайлык кеңешмеде чет өлкөлөрдө жашаган кытайларды, мекенине кайтып келген жарандарды өлкөнүн өнүгүшүнө жана "кытай улутунун улуу кайра жаралуусуна" салым кошууга чакырды. Бул тууралуу кытайлык маалымат агенттиктери кабарлашты.

Ал чет өлкөдөгү мекендештер менен иштөөнү күчөтүп, аларды өлкөнүн модернизациясына, улуттук биримдикти бекемдөөгө, кытай маданиятын жайылтууга жана эл аралык кызматташтыкты өнүктүрүүгө жигердүү катышууга үндөдү.

Маалыматка ылайык, учурда дүйнөнүн 200гө жакын өлкөсүндө 60 миллиондон ашык кытай жашайт. Ошондой эле 40 миллиондон ашык адам чет өлкөдөн Кытайга кайтып келип, өлкөнүн өнүгүшүнө өз салымын кошуп келет.

Белгилей кетсек, хуацяо деп чет өлкөлөрдө жашаган Кытай жарандары жана мурда көчүп кеткен кытайлардын урпактары аталат. Кытайда алар улуттук тегине жараша мекендеш катары кабыл алынат.