79 жаштагы Арнольд Шварценеггер туулган күнүн машыгуу залында белгиледи

Белгилүү актёр жана бодибилдинг боюнча жети жолку «Мистер Олимпия» Арнольд Шварценеггер 79 жашка толгон күнүн дагы бир жолу спорт менен белгиледи.

30-июлда ал социалдык тармактагы баракчасына күч машыгуусунан тартылган сүрөттөрдү жарыялап, күйөрмандарына белек алып келбөөнү өтүндү. "Бүгүн мен 79 жашка чыктым. Мага эч кандай белек кереги жок. Анын ордуна мен жана менин командам фитнес индустриясын жаңы деңгээлге чыгарып жатабыз", - деп жазды Шварценеггер.

Жарыяланган сүрөттөрдө актёр ачык асман алдындагы машыгуу аянтчасында кол булчуңдарын машыктырып жатканын көрүүгө болот.

«Темир Арни» үчүн туулган күнүн спорт залында өткөрүү салтка айланган. Өткөн жылы 78 жашын белгилегенде да ал велотренажёрдо кардио машыгуу жасап жаткан видеосун бөлүшкөн.

Жашы 79га чыкканына карабастан, Арнольд Шварценеггер дагы эле үзгүлтүксүз машыгып, кино тартууларга катышып жана фитнес долбоорлорун өнүктүрүүнү улантып келет.