Тажикстан сакал менен хижабга тыюу салынганы тууралуу маалыматты четке какты

Тажикстандын Дин иштери, улуттук каада-салттарды, салтанаттарды жана жөрөлгөлөрдү жөнгө салуу комитети өлкөдө сакал коюуга жана хижаб кийүүгө мыйзам деңгээлинде тыюу салынганы тууралуу маалыматты четке какты.

Мекеменин билдирүүсүнө караганда, айрым чет элдик жалпыга маалымдоо каражаттарында жарыяланган маалыматтар өлкөдөгү диний эркиндиктин чыныгы абалын чагылдырбайт.

Комитет Тажикстанда жарандардын абийир эркиндигин жана дин тутуу укугун ишке ашыруу үчүн зарыл болгон мыйзамдык шарттар түзүлгөнүн белгиледи.

Ошондой эле мекеме өлкөдөгү диний эркиндик тууралуу айрым баалоолор ишенимсиз булактарга негизделгендиктен, чыныгы жагдайды чагылдырбай турганын билдирди.

Буга чейин Борбор Азия жана Орусиядагы бир катар басылмалар Тажикстанда эркектерге сакал өстүрүүгө, аялдарга хижаб кийүүгө мыйзам менен тыюу салынганы жана бул талаптарды бузгандарга айып пул салына турганы тууралуу маалымат таратышкан.