ЖМК: Нетаньяху Трамп менен Иранга басымды күчөтүүнү талкуулады

Израилдин премьер-министри Биньямин Нетаньяху АКШнын президенти Дональд Трамп менен жолугушууда Иранга карата экономикалык басымды күчөтүү маселесин талкуулаганын Axios басылмасы израилдик жогорку даражалуу аткаминерге шилтеме берүү менен билдирди.

Жолугушуу 28-июлда Ак үйдө өтүп, кийинчерээк Ак үйдүн басма сөз кызматы сүйлөшүүлөр позитивдүү жана жемиштүү маанайда өткөнүн маалымдаган.

Axios маалыматына ылайык, Нетаньяху Трампка Иран менен жаңы келишим түзүү мүмкүнчүлүгүнө күмөн санай турганын билдирип, Тегеранга карата басымды күчөтүүнү сунуштаган. Анда күч колдонулган («кинетикалык») жана күч колдонулбаган («кинетикалык эмес») чараларды айкалыштыруу мүмкүнчүлүгү талкууланган.

Булактын айтымында, лидерлер үч негизги вариантты карашкан:

* Иранга карата экономикалык жана деңиз блокадасы аркылуу басымды күчөтүү;
* Иран менен жаңы келишимге жетишүү;
* Аскердик соккуларды кайра жандандырып, күчөтүү.

Азырынча бул варианттар боюнча расмий чечим кабыл алынганы тууралуу маалымат жок.