Мыйзамсыз курулуш жүргүзгөн компанияны кара тизмеге киргизүү сунушталды

Бишкекте мыйзамсыз курулуш жүргүзгөн “Император Строй” ЖЧКсын кара тизмеге киргизүү сунушталды. Бул тууралуу Курулуш министрлиги кабарлады.

Буга чейин аталган объект боюнча “Долбоорлоо жана куруу процесстерин айкалыштыруу жөнүндө” буйрук күчүн жоготконуна байланыштуу архитектуралык-уруксат берүүчү документтер кайра алынган. Ошондой эле курулуш иштерин токтотуу жөнүндө расмий билдирүү берилген. Бирок текшерүү учурунда коюлган талаптарга карабастан, объектте курулуш-монтаждоо иштери уланып жатканы аныкталган.

Мыйзам талаптарын бузгандыгы үчүн курулуш иштерин жүргүзүп жаткан тарапка 213 000 сом өлчөмүндө айып пул салынган. Мындан тышкары, укуктук баа берүү үчүн Ички иштер министрлигине тиешелүү кат жөнөтүлгөн.

Ушул жылдын 13-июлундагы көзөмөлдүк текшерүүдө да курулуш иштеринин токтотулбаганы аныкталган.

Жыйынтыгында, мыйзам талаптарын одоно бузгандыгы үчүн “Император Строй” ЖЧКсын Курулуш министрлигинин кара тизмесине киргизүү жана курулуш лицензиясын токтотуу боюнча министрликке сунуш кат жөнөтүлдү.