Караколдо эл аралык шахмат турнири өтөт

2026-жылдын 2-9-август күндөрү Ысык-Көл облусунун Каракол шаарында мамлекеттик ишмер Жусуп Абдрахмановдун 125 жылдыгына арналган "Жибек жолу кубогу" эл аралык балдар шахмат турнири өтөт. Бул тууралуу Маданият, маалымат жана жаштар саясаты министрлиги билдирди.

Турнир "Ысык-Көл облусунун шахмат федерациясы" коомдук бирикмеси тарабынан уюштурулууда.

Иш-чаранын максаты – жаш муундун интеллектуалдык потенциалын өнүктүрүү, шахматка болгон кызыгуусун арттыруу, таланттуу жаш шахматчыларды аныктоо жана алардын спорттук чеберчилигин өркүндөтүүгө көмөк көрсөтүү.

Мындан тышкары, турнир интеллектуалдык спортту жайылтууга, жаш шахматчылардын тажрыйба алмашуусуна, эл аралык кызматташтыкты чыңдоого жана ар кайсы өлкөлөрдөн келген өспүрүмдөрдүн достук байланышын бекемдөөгө багытталган.

Турнирдин жүрүшүндө катышуучулар стратегиялык жана логикалык ой жүгүртүү жөндөмдөрүн көрсөтүп, байгелүү орундар үчүн күч сынашат.