Германияда аптаптуу ысыктан 10 миңге жакын адам каза болду

Германияда 2026-жылы катуу ысыктан улам дээрлик 9,8 миң адам каза болгон. Бул тууралуу Роберт Кох институту билдиргенин Reuters агенттиги жазды.

Маалыматка ылайык, каза болгондордун көбү 75 жаштан жогорку адамдар болгон. Институттун белгилөөсүндө, абанын орточо температурасы 20 градустан жогорулаган жумаларда өлкөдө өлүм көрсөткүчү кыйла өсөт.

Германияда июнь айында абанын температурасы 40 градустан ашкан рекорддук ысык катталган. Институт адистери алдыдагы күндөрдө да аномалдуу ысык аба ырайы курмандыктардын санын көбөйтүшү мүмкүн экенин эскертишти.

Быйыл жайында Европанын бир катар өлкөлөрү, анын ичинде Франция, Испания, Италия, Улуу Британия жана Германия катуу ысыкка кабылды. Июндун аягынан бери Европада аптаптын кесепетинен 1,3 миңден ашуун адам каза болгону айтылууда.