АКШдагы циклоспороздун жайылышы башка өлкөлөргө да коркунуч жаратышы мүмкүн

Бүгүн, 3-августта АКШда катталган циклоспороз (булганган азык-түлүк жана суу аркылуу жугуучу ичеги-карын инфекциясы) инфекциясынын жайылышы өлкө аймагынан тышкары да чыгышы мүмкүн экенин Think Healthy Group компаниясынын башкы директору доктор Тэйлор Уоллес чет өлкөлүк басылмаларга билдирди.

Анын айтымында, инфекциянын башка өлкөлөргө жайылышындагы негизги коркунуч оорулуу адамдар эмес, булганган азык-түлүк, өзгөчө салат жалбырактары болуп саналат. Адистин белгилешинче, кооптуу азык-түлүк Мексикада да сатылганы тууралуу маалымат бар.

Ошондой эле ал циклоспороз адамдан адамга түздөн-түз жукпай турганын түшүндүрдү. Паразит организмден чыккандан кийин сыртта бир нече күн өнүгүү баскычынан өтүшү керек болгондуктан, оорулуу адам кадимки байланыш аркылуу башкаларга инфекцияны жугузбайт.

Учурда адистер булганган азык-түлүк кайсы өлкөлөргө жеткирилгенин иликтөөнү улантууда.

АКШнын Ооруларды көзөмөлдөө жана алдын алуу борборунун маалыматына ылайык, 2026-жылдын май айынан бери өлкөдө циклоспороздун 6,7 миңден ашык учуру тастыкталып, дагы 11,5 миңден ашуун учур кошумча текшерүүгө алынган. Былтыр ушул эле мезгилде 249 гана учур катталган.