Крокодилдер түрмө кайтарабы? Израилдин жаңы планы сотто талкууланды

Кечээ, 2-августта Иерусалимдин райондук соту Кциот түрмөсүндө крокодилдерди коопсуздук үчүн колдонуу планына убактылуу тыюу салды. Бул тууралуу Times of Israel басылмасы жазды.

Буга чейин Израилдин Улуттук коопсуздук министрлиги түрмөнүн аймагында 170 метрлик аң куруп, аны крокодилдер менен толтурууну пландаган. Маалыматка караганда, крокодилдер ХАМАС мүчөлөрү кармалган блокту кайтаруу үчүн “тирүү тосмо” катары колдонулмак.

Сотко жаныбарларды коргоочу Let the Animals Live уюму кайрылган. Сот бул маселе кошумча кароону талап кылат деп таап, акыркы чечим чыкканга чейин курулуш иштерин токтотту. Ошондой эле чечим чыкканга чейин крокодилдерди түрмөгө алып келүүгө тыюу салынды.

Крокодилдерди колдонуу планы июль айынын аягында белгилүү болгон. Долбоор Израилдин Айлана-чөйрөнү коргоо министрлиги нил крокодилдеринин статусун өзгөртүп, аларды туткунда өстүрүүгө уруксат бергенден кийин мүмкүн болгон.

Жаныбарларды коргоо уюмдары бул демилгеге каршы чыгып, крокодилдерди түрмө кайтарууда колдонуу мыйзамдык жана экологиялык көйгөйлөрдү жаратышы мүмкүн экенин билдиришкен. Израилдин Табиятты жана парктарды коргоо башкармалыгы да мындай пландын негиздүүлүгүнө күмөн санаган.