Молдова менен Нидерландда сууну пайдаланууга чектөөлөр киргизилди

Бүгүн, 4-августта Молдова менен Нидерландда суу ресурстарын пайдаланууга бир катар чектөөлөр киргизилди. Бул тууралуу чет өлкөлүк маалымат каражаттары кабарлашты.

Молдовада Днестр дарыясынын суусунун деңгээли төмөндөп кеткенине байланыштуу бассейндерди толтурууга, көчөлөрдү жана тротуарларды жууганга ичүүчү жана суу сактагычтардагы сууну пайдаланууга тыюу салынды. Айыл чарба тармагына Днестрдин суусун түнкү саат 21:00дөн 06:00гө чейин гана пайдаланууга уруксат берилип, маанилүү категорияга кирбеген өнөр жай ишканалары суу керектөөсүн кеминде 20 пайызга кыскартууга милдеттендирилди.

Ошондой эле кургакчылыктан жабыркаган аймактар үчүн резервдик кудуктарды даярдоо жана суу ташуучу унааларды уюштуруу иштери башталды. Кишинёвду үзгүлтүксүз суу менен камсыздоо үчүн шаардык суу оператору күчөтүлгөн даярдык режимине өткөрүлдү.

Ал эми Нидерланддын Делфланд аймагында кургакчылыктан улам каналдар коммерциялык жана эс алуу үчүн жүргөн кемелерге жабылды. 5-августтан тартып Гаага менен Роттердамдын ортосундагы бардык шлюздар кемелер үчүн жабылат.

Мындан тышкары, каналдардан, суулардан жана арыктардан суу алууга тыюу салынды. Чектөө айыл чарба ишканаларына, күнөсканаларга, спорттук объекттерге жана жеке турак жай ээлерине да тиешелүү.

Аймактын суу ресурстарын башкаруу кызматынын маалыматына караганда, кургакчылыктан улам таза суунун запасы тез азайып, жээктеги суу системине күч келип жатат. Чектөөлөр дамбаларды коргоого, жаратылышка зыян келтирбөөгө жана деңиз суусунун кургактыкка кирип кетишине жол бербөөгө багытталган.