Акылбек Түмөнбаев Корумду айылындагы таза суу долбоорунун жүрүшү менен таанышты

Жогорку Кеңештеги «Элдик» депутаттык тобунун жетекчиси Акылбек Түмөнбаев Ысык-Көл облусунун Түп районундагы Корумду айылына иш сапары менен барып, 2018-жылы башталган таза суу долбоорунун учурдагы абалы менен таанышты. Иш сапарга курулуш, архитектура жана турак жай-коммуналдык чарба министри Нурдан Орунтаев да катышты.

Маалыматка ылайык, Акылбек Түмөнбаев ичүүчү суу маселеси айыл тургундары үчүн эң негизги көйгөйлөрдүн бири экенин белгилеп, долбоорду тез арада бүткөрүү жана кошумча резервуар орнотуу зарылдыгын айтты.

Мындан тышкары, эл өкүлү Корумду айылындагы 275 орундуу мектептин курулушун сентябрь айына чейин баштоо керектигин белгилеп, тиешелүү тапшырмаларды берди.