ТикТоктогу түз эфир чатагы: Блогер аял ооруканага жаткырылды (видео)

Казакстандын Жамбыл облусунда ТикТокто "Алтын кыз" деген ат менен белгилүү Лайло Касымова психикалык ден соолук борборуна жаткырылды. Бул тууралуу Казакстандын маалымат каражаттары жазып чыгышты.

Маалыматка ылайык, аял түз эфирлерде адепсиз сөздөрдү колдонгону үчүн буга чейин бир нече жолу административдик жоопкерчиликке тартылган. Эскертүүлөргө карабастан, мындай аракетин улантып, түз эфирде жашы жете элек балдарына карата да орой сөздөрдү колдонгону айтылууда.

Полиция жана камкордук органдары балдардын жашоо шартын текшерип, учурда алар атасынын көзөмөлүндө экенин билдиришти.

"Тез жардам" кызматкерлери кароодон өткөргөндөн кийин Касымова Жамбыл облустук психикалык ден соолук борборуна жаткырылып, учурда дарыланууда.

Буга чейин Казакстандын ИИМи өлкө боюнча 20дан ашуун стример жоопкерчиликке тартылганын маалымдаган.