УКМК Ошто бажычылар кармалганын билдирди

Ош бажысында эки инспектор кармалды. Алар кызмат абалынан кыянаттык менен пайдаланууга шектелип жаткандыгын бүгүн, 7-сентябрда УКМКнын маалымат борбору билдирди.

Маалыматка караганда, К.У. жана Т.А. аттуу инспекторлор айрым ишкерлер менен алдын ала сүйлөшүп, акча алуу үчүн товарларды тийиштүү текшерүүдөн өткөрбөй, бажы көзөмөлүнөн мыйзамсыз өтүшүнө жардам беришкен.

Мындан улам мамлекетке олуттуу материалдык зыян келтирилгени айтылууда. Кармалган эки инспектор УКМКнын тергөө абагына камакка алынды.

Учурда тергөө уланып, мыйзамсыз схемага катыштыгы бар башка бажы кызматкерлери да аныкталууда.