Бишкекте баңгизат сатууга шектелип эки кыз кармалды (видео)

Бишкекте Мамлекеттик бажы кызматынын катышуусунда синтетикалык баңгизаттарды таратуу каналы аныкталып, анын ишине бөгөт коюлду. Бул тууралуу 8-сентябрда ИИМдин Баңгизаттарды мыйзамсыз жүгүртүүгө каршы күрөшүү кызматы билдирди.

Маалыматка караганда, июнь айында Бишкекте эки кыз кармалган. Алар Орусиянын Москва шаарынан бензиндин идишин тосуп алышкан. Анын ичинен 250 грамм "спайс" табылган.

Ошондой эле шектүүлөрдүн биринин үйүнөн баңгизатты таңгактоого арналган каражаттар, 3 грамм ак түстөгү порошок жана экстази болушу мүмкүн деген 215 таблетка табылган.

Тергөөнүн маалыматы боюнча, кармалгандар интернет-дүкөн аркылуу психотроптук заттарды Бишкекте жашыруу ыкмасы менен таратып келишкен.

Ошол эле учурда Орусияда ири көлөмдөгү баңгизаттарды Борбор Азия өлкөлөрүнө жөнөтүүгө шектелген адам кармалды.

ИИМдин маалыматына ылайык, баңгизаттардын баасы 1,5 миллион сомдон ашмак. Бул кармоолор Кыргызстанда 1,7 миңден ашык бир жолку синтетикалык баңгизат дозасынын таралышына бөгөт койгондугу маалыматта кошумчаланды.