Бишкекте ИИМдин окуу борборунда мамлекеттик тил боюнча тегерек стол өттү

Мамлекеттик тил күнүнө карата Ички иштер министрлигинин генерал-майор милиция Ж.Ш. Шабиров атындагы республикалык окуу борборунда мамлекеттик тилди ички иштер органдарында колдонуу маселелерине арналган тегерек стол өттү. Бул тууралуу ИИМдин басма сөз кызматынан билдиришти.

Иш-чара «Кыргыз Республикасынын ички иштер органдарында мамлекеттик тилди колдонууну өркүндөтүү жана көйгөйлөрдү чечүү жолдору» деген темада уюштурулган.

Анын негизги максаты — ички иштер органдарында мамлекеттик тилди колдонууну жакшыртуу, кызматтык иш кагаздарын кыргыз тилинде сапаттуу жүргүзүү жана кызматкерлердин тилдик сабаттуулугун жогорулатуу.

Тегерек столго Кыргыз Республикасынын президентинин алдындагы Мамлекеттик тил жана тил саясаты боюнча улуттук комиссиянын төрагасы Мелис Мураталиев, ИИМдин Башкы штабынын мамлекеттик тил жана редакциялоо бөлүмүнүн башчысы, милициянын полковниги Айбек Орозакунов, Агартуу министрлигинин мектептик билим берүү башкармалыгынын жетектөөчү адиси Гүлнара Ибраимова, ошондой эле мамлекеттик тил, билим берүү, илим, укук коргоо жана коргонуу тармактарынын өкүлдөрү катышты.

Иш-чаранын жүрүшүндө мамлекеттик тилде кызматтык документтерди жүргүзүү, укуктук документтердин тилдик сапатын камсыз кылуу, кесиптик терминологияны бирдей колдонуу жана кызматкерлердин кыргыз тилинде иш алып баруу көндүмдөрүн жакшыртуу маселелери талкууланды.

Мындан тышкары, катышуучулар республикалык окуу борборунун атайын жабдылган окуу класстары менен таанышып, курсанттар тарабынан Мамлекеттик тил күнүнө карата даярдалган дубал гезиттердин көргөзмөсүн көрүштү.

Жыйынтыгында ички иштер органдарында мамлекеттик тилди колдонуу маданиятын жана кызматтык иш кагаздарын жүргүзүүнүн сапатын жогорулатууга багытталган бир катар сунуштар иштелип чыкты.

Иш-чаранын соңунда окуу борборунун курсанттары патриоттуулукту, улуттук баалуулуктарды урматтоону жана мамлекеттик тилди жайылтууну көздөгөн маданий программа тартуулашты.