Мурдагы өзгөчө кырдаалдар министри кармалды

Аскер прокуратурасы жүргүзгөн текшерүүнүн жыйынтыгында Өзгөчө кырдаалдар министрлигинин кызмат адамдары тарабынан «Байтик» метеостанциясынын аймагында кызматтык-тиричилик багытындагы имарат мыйзамсыз курулганы аныкталды.

Маалыматка ылайык, имарат долбоордук-сметалык жана уруксат берүүчү документтерсиз, Ала-Арча дарыясынын суу коргоо зонасына кирген аймакта, дарыядан беш метр аралыкта курулган.

Прокуратуранын маалыматына караганда, мыйзамсыз курулуштун натыйжасында мамлекетке өзгөчө ири өлчөмдө зыян келтирилген.

Бул факты боюнча Кылмыш-жаза кодексинин 337-беренеси — Кызмат абалынан кыянаттык менен пайдалануу беренеси боюнча кылмыш иши козголгон.

Жүргүзүлгөн тергөө иш-чараларынын алкагында кылмыш жасоого шектүү катары Өзгөчө кырдаалдар министрлигинин мурдагы министри Б.А. кармалып, Бишкек шаардык ички иштер башкармалыгынын убактылуу кармоочу жайына киргизилди.

Учурда кылмыш иши боюнча тиешелүү тергөө амалдары жүргүзүлүп жатканы айтылды.