Meta жасалма интеллектке негизделген жаңы түзмөктөрүн тааныштырды

Meta компаниясы Meta Connect иш-чарасында жасалма интеллектке негизделген бир катар жаңы гаджеттерин тааныштырды. Алардын арасында жеңил VR көз айнеги, Muse аттуу ЖИ жардамчысы жана камерасы жок Ray-Ban Meta көз айнеги бар.

Жаңы Meta VR Glasses виртуалдык реалдуулук көз айнегинин салмагы болгону 100 граммды түзөт. Анын оор техникалык бөлүктөрү өзүнчө чөнтөккө салынуучу блокко жайгаштырылып, көз айнекке ичке зым аркылуу туташат. Түзмөк 5K экрандар, IMAX Enhanced сертификаты жана виртуалдык кеңсе режими менен жабдылган. Башкаруу көз караш, үн жана кол жаңсоолору аркылуу жүргүзүлөт.

Көз айнектин баасы 1299 доллар болуп, 2027-жылдын жазында сатыкка чыгары күтүлүүдө.

Компания ошондой эле Muse Charm деп аталган чакан ЖИ жардамчысын көрсөттү. Сырткы көрүнүшү боюнча заманбап Тамагочиге окшош түзмөктү чөнтөккө салып жүрүүгө же брелокко тагууга болот. Ал суроолорго жооп берип, айлана-чөйрөнү талдап, ар кандай тапшырмаларды аткарууга жардам берет. Muse Charm 2026-жылдын декабрында сатыкка чыгышы мүмкүн, бирок баасы азырынча жарыялана элек.

Мындан тышкары, Meta камерасы жок Ray-Ban Meta Audio акылдуу көз айнегин сунуштады. Анда музыка угуу, чалууларды кабыл алуу, үн жардамчысын колдонуу жана сүйлөшүүлөрдү которуу мүмкүнчүлүктөрү бар. Көз айнектин салмагы 43 грамм, батареясы 12 саатка чейин жетет. Баасы 349 доллардан башталат.

Компания камерасы бар Ray-Ban Meta көз айнегинин үчүнчү муунун да көрсөттү. Жаңы модель 12 мегапикселдүү камерага ээ болуп, 3K форматында видео тарта алат. Ошондой эле жаңы дизайндар жана Кайли Дженнер менен Blackpink тобунун Лисаcы менен биргеликте даярдалган атайын коллекциялар сунушталды.

Жаңы функциялардын жардамы менен көз айнектер товарларды таанып, алардын баалары жана пикирлери тууралуу маалымат берип, сатып алууга жана машыгуу учурунда үн аркылуу кеңеш алууга жардам бере алат. Навигацияда көчө аттарынын ордуна имараттар жана башка тааныш объектилер багыт катары колдонулат.