Үйүңүздүн бир бөлмөсү жылып, экинчиси муздакпы? Мунун себеби түшүндүрүлдү

Бишкектеги 104, 105 жана 106-сериядагы бир түтүктүү жылытуу системи орнотулган үйлөрдө бир бөлмөдөгү радиатор ысык болуп, экинчисиндеги радиатор жетиштүү жылытпай калышы мүмкүн. Бул тууралуу бүгүн, 6-ноябрда "Бишкек жылуулук тармагы" муниципалдык ишканасы билдирди.

Маалыматка ылайык, мындай көрүнүш жылытуу системине аба топтолгондо, крандар жабылганда, түтүктөр бүтөлгөндө же туташтыруу схемасы бузулганда пайда болот.

Ишкана турак жайларда бөлмөнүн абасынын температурасы +18 градустан төмөн болбошу керектигин эскертти. Эгер үй суук болсо, тургундар жылытуу системин текшерүү үчүн тейлөөчү уюмга кайрылышы зарыл.

Жылытуу боюнча суроолор болсо, шаар тургундары 1980, 0312 61-11-69 жана 0557 61-11-66 телефондору аркылуу байланышса болот.