Ат чапсаң ат мыктысын алыстаткан,
Арт жакта азаматтар калып жаткан.
Санаага чөгүп кетип бүт карааның,
Саматтың далайларды алыс жактан.

Кайырма:
Эй, тоолук кыз, ой, тоолук кыз,
Тойбой сенин элесиңе,
Топ жигиттер ашыкпыз.

Кайратың карды эритет чыкыроондо,
Ажарың айды үркүтөт түнкү тоодо.
Өрттөнүп кетеби дейм боз уландар,
Өзүңө жакындашып бир болгондо.

Кайырма:

Чабандык кесип - сенин баатырдыгың,
Чабалдык кылат эрдин баатырдыгын.
Кошулсаң сага шаардык даяр эле,
Койчу болуп берүүгө макулдугун.

Маанай чөксө, досум, кайгырба,
Алсыз болуп дилди алдырба.
Турмуш - сыноо, бакыт да келет,
Көңүлүңдү өзүң жаз кыл да.

Кайырма:
Айланат, жыл айланат,
Өтөт мезгил, күндү биз барктайлы...
Агарат, дил тазарат,
Жакшы сөздү биз дайым айталы.

Сен жылмайсаң аалам жылмаят,
Обон салсаң жүрөк ыргалат.
Баарын өзүң жөнгө сала жүр,
Күлүп турсаң жашоо нурданат.

Кайырма:

Жалтанбагын, жашоо сонун,
Бийле, ырда, тап обонун.
Тагдырдын чеч табышмагын,
Таба билгин бакыт жолун.
Алга баскын үмүт менен,
Келечектин койну кенен,
Бирге болгун элиң менен…

Кайырма:

Адамзат, бүт адамзат,
Жер жүзү сонун, сактап калалы...
Жандана, биз жандана,
Келечекке бир кадам таштайлы...

Сүйүүмсүң, сүйүүмсүң жүрөгүмдө чачылбаган,
Сырымсың эч кимдерге ачылбаган.
Жарыксың асманымда жанып турган,
Жүрөксүң жүрөгүмдү кагып турган.

Төрмөлөп, төрмөлөп өзүң үчүн калгам жолдон,
Өмүрсүң өмүр бою арман болгон.
Суктандырып көргөндөрдү таң калтырган,
Сулуусуң бүт ааламды тамшандырган.

Ыйыгым, ыйыгым, тумарымдай тагылгансың,
Ырымдын эң акыркы сабындайсың.
Сүйүүмсүң жүрөгүмдө чачылбаган,
Жүрөксүң жүрөгүмө катып алган.
Жарыксың асманымда жанып турган,
Жүрөксүң жүрөгүмдү кагып турган.

Өңүмбү же түшүмбү, бир кыз көрдүм,
Кураладай кулпурган кундуз көрдүм.
Кызыл канат кыздардын периштеси,
Тээ асмандан жерге түшкөн жылдыз көрдүм.
Камыш канат кашы,
Кара зердей чачы.
Кулпурганы толгон айдай,
Канчада экен жашы?
Карагаттай көзү,
Бал татыган сөзү.
Көйкөлгөнү перинин, Каныкейдин өзү.

Күндүз эстен, кетпеди түндө түштөн,
Алтын жылдыз асмандан кимге түшкөн?
Жалгыз гана өзүбү жерде жүргөн?
Же сиңдилери бар бекен а бирге түшкөн?
Камыш канат кашы,
Кара зердей чачы.
Кулпурган толгон айдай,
Канчада экен жашы?
Карагаттай көзү,
Бал татыган сөзү.
Көйкөлгөнү сулуунун, Айчүрөктүн өзү.

Мындай кыздар асмандан келбесе экен,
Жигиттердин көңүлүн бөлбөсө экен.
Ай деп, күн деп жете албай жүргөн кызым,
Бир досумдун урматтуу жеңеси экен.
Көңүл, чиркин, калды,
Жүрөк оттой жанды.
Кундуз деген жеңебиз бир тозокко салды.
Сулуулугу мыкты,
Жеңем болуп чыкты.
Мендеги таза махабат,
Жай көрбөй, көрдү кышты.
Мендеги сүйүү махабат, Ошол менен бүттү.

Бүркөк асман, жарк дегенде чагылган,
Байкоосуздан жалыныңа кабылгам.
Бүт эркимди курчап алып махабат,
Жалгыз сенин элесиңди жамынгам.
Азыр мен да сени ойлоп жатамын,
Ошол күндөр бүткөн өңдүү канымдан.

Жымыңдашып жанып-өчүп чырактар,
Али эсимде бирге олтурчу убактар.
Жүрөктөрдүн кагышканын тыңшачу,
Алыс калды алма жыттуу турак жай.
Чертчү эле го түгөнбөгөн күүлөрүн,
Миң кайталап музыкалуу булактар.

Таппай такыр махабаттын айласын,
Сагындым мен жолукчу күн, ай башын.
Мурункудай күтүп жатам азыр да,
Булбул куштун тереземден сайрашын.
Ар убакта жолукчу элек бакчадан,
Айтчы деги, асылкечим, кайдасың?

Даамы кандай, түсү кандай билбедим,
Кармап кээде келет жытын искегим.
Кичинеби, орточобу же бойлуубу?
Өмүрдү мен, жашоону мен адамдардай издедим.

Кээде жумшак колун артып мойнума,
Теңтушумдай суу да чачат койнума.
Мас кылбаган шарап ичкен сыяктуу,
Өмүргө мен, жашоого мен такыр тойбой койдум да.

Билбейм, билбейм, өмүр мени издейби,
Же болбосо өмүрдү мен издеймби.
Мынча жашап эч түшүнбөй келатам,
Ушул өмүр, ушул жашоо келеби да, кетеби.

Арыбай аттын басканы,
Айланып өтөм асканы.
Тозоктуу шамал бетке уруп,
Тоолорду булут каптады.

Бозбунун тоосун ашканда,
Боз булут каптап асманда.
Болжошкон ошол мүнөттөр, ий,
Боздоп бир жетпей жатканда.

Тайгалак жолдо чекелеп да,
Тай-тайлап атты жетелеп.
Ошондо калган бир элес, ай,
Али да эстен кете элек.

Тагдырымдан эртелеп,
Таза, мөлтүр махабат күткөн элем.
Ак куу сындуу эркелеп,
Асмандай көк Соң-Көлдө сүзгөн элем.
Ал Соң-Көлдөн айрылып,
Ак канатым кайрылып
Жантай хандын торуна түшкөн элем.

Кенен Кемин тар болуп,
Оор кайгы төмөндөн басты мына.
Көкүрөккө зар толуп,
Көзүм жетти бактымдын аздыгына.
Ичке катып бугумду,
Ичке катып муңумду,
Жашым кулайт түн сайын жаздыгыма.

Оо, тагдырым, тагдырым
Ушунча да сен ташбоор болосуң
Баарын үйүп кайгынын
Өмүр бою зарлантып коесуңбу.
Күн болоюн өзүңө,
Бир көрсөтчү көзүмө,
Эңсеп жүргөн жалгызым Болотумду.

Ашыгымды, ырчымды,
Эстеп, эңсеп өңүмдөн азып жүрөм.
Ага арнаган сыйкырлуу
Махабатты жүрөккө катып жүрөм.
Аны көрүп түшүмдө,
Бирге батып үзүргө,
Ай нуру сепкен жайлоодо басып жүрөм.

Артыңдан барсам бакчага,
Артылып колуң башкага, эй.
Жалынып сүйлөп жатыпсың,
Жактырбай сени жатса да, ой.
Сүйүүнүн эй, күчү керемет,
Олдо, жалынтат экен, ий, башкага.

Ак көйнөк кийип таптаза,
Акактай жайнап кашкая, эй.
Үйрүлө түшүп жатыпсың,
Үшкүрө түртүп жатса да, ой.
Сүйүүнүн эй, күчү керемет,
Олдо, жалынтат экен, ий, башкага.

Сезилбей дүйнө бир сага,
Сен турдуң кетпей жанымда, эй.
Саамайдан жыттап толгойсуң,
Санаалаш курбуң турса да, эй.
Сүйүүнүн эй, күчү керемет,
Олдо, жалынтат экен, ий, башкага.

Ак куудай түнөгүндө,
Ак билек жүрөгүмдө.
Билели баркыбызды ,
Бир келген бул өмүрдө.

Кайырма:
Кел, достор отуралы,
Болбосту болтуралы.
Көңүлдүн бөксө жерин,
Ыр менен толтуралы.

Бар болсо шүгүр дейли,
Аз болсо кейибейли.
Бири кем жалган дүйнө,
Бирок биз кемибейли

Кайырма:

Таарынчың койчу нары,
Таалайга кол суналы.
Бактылуу, узун өмүр,
Үмүткө бой суналы.

Кайырма:

Көгүш кымкап жер жамынып көктөмдө,
Көктөм булут мөлтүр жашын төккөндө.
Мен атайлап бир кайрылдым кечээрээк
Биз жашынмак ойноп жүрчү өстөнгө.

Эске албай элеп жамгыр төккөнүн,
Жар боорунан жаркын гүлдөр издедим.
Алар да жок, бирок эсте калыптыр,
Чуркап өткөн сенин, менин издерим.

Көрчү-көрчү, кыял, чиркин, шашканын,
Көзгө элестейт беш көкүлдүү жаш чагым.
Балалык кез эске түшүп ушунча,
Байкабапмын жүрөгүмдүн сыздаарын,
Билбептирмин жүрөгүмдүн сыздаарын.