Ала качып, ала качып, ала качып,
Аргымактар арыш керет.
Азынатып, азынатып, азынатып,
Азаматтар намыска бек.
Шамдай жанып алышып,
Шамал менен жарышып,
Жүзүн сүртүп булутка,
Жүрөгү - от, каны ысык.
Ала-Тоону бел кылып,
Ата Журтту дем кылып.
Абалтадан шок болот,
Алоолонгон от болот.
А болбосо жок болот,
Кыргызымдын жигиттери!

Дүңгүрөтүп, дүңгүрөтүп, дүңгүрөтүп,
Жердин бетин тулпар келет.
Дүркүрөтүп, дүркүрөтүп, дүркүрөтүп,
Дүйнө жүзүн шумкар келет.
Кубанышат кыргыздар,
Кучак жайып жылдыздар.
Ал анткени алардын,
Арасында Чыңгыз бар.
Аалам кезет жомоктой,
Ак калпагын жоготпой.
Акыл-эсин камчылап,
Аккуладай алкынат.
Ай-жылдызга талпынат,
Кыргызымдын жигиттери!

Учту мына, учту мына, учту мына,
Айчүрөкпү же ак куубу?
Шукшурула, шукшурула, шукшурула,
Жигит шумкар сыяктуубу?
Закымдады кыз улам,
Жакындады боз улан.
Ана жетти, жетти, жетти,
Бек кучактап кетти, кетти, кетти.
Ак сүйүүгө бек болот,
Ак достукка чеп болот.
Кызыл гүлүң соолбосун,
Кыдыр болуп жолдошуң,
Кыраан Манас колдосун,
Кыргызымдын жигиттери!
Кызыл гүлүң соолбосун,
Кыдыр болуп жолдошуң,
Бабам Манас колдосун,
Кыргызымдын жигиттери!

Көрүшкөнчө көздөрүңдөн чагылган,
Нурларынан курган кайран көпүрөм.
Бекемине күмөн санап жаңылгам,
Өтүмү жок болгонума өкүнөм.

Кимге барып күйүтүмдү,
Кимге барып өтүнөм?
Кимге барып күйүтүмдү,
Кимге барып күнү-түнү,
Кимге барып өтүнөм?

Таңшыгыча табышмактуу таң сыры,
Тандап кеттиң таңы салкын өлкөнү.
Табалабайм, кайрылганда айт чынын,
Артык бекен башка жердин көркөмү?

Арбалсаң да бир келерсиң,
Ала-Тоону көргөнү.
Сагынганда бир келерсиң,
Саргайганда бир келерсиң,
Ала-Тоону көргөнү.

Кала берем мекенимде сени эстеп,
Жүрсө экен деп алыс жерде аман-соо.
Өтүнөрүм, көкүрөгүм элестеп,
Көргөн сайын жалын бүрккөн жанар тоо.
Жалын бүрккөн үшкүрүгүм,
Жаңырыгы жарар зоо.
Жалын бүрккөн үшкүрүгүм,
Жалын бүрккөн үшкүрүгүм,
Жаңырыгы жарар зоо.
Сагынганда бир келерсиң,
Саргайганда бир келерсиң,
Ала-Тоону көргөнү,
Ала-Тоону көргөнү.

Аппак сүтүн энекемдин мен, кантип актайм?
Карбаластап берекемдин жытын таптайм.
Балалыгымды, кубанычымды,
Жүрөгүмдөгү сагынычымды,
Энекебайым кайтарып берчи, суранычымды.

Кайырма:
Балалыгым айла барбы,
Колум жеткис жайда калды.
Аттиң артта балдай таттуу,
Кайталангыс күнүм калды.

Канат жайып турмуш жолунда, зымырап барам,
Өкүнүчтө балалыгымдын эшигин жабам.
Аластап салган, алтын энемдин,
Алдейи жаткан арча бешигим.
Терметип келем, термелип келем, жашоо бешигин.

Кайырма:

Аластап салган, алтын энемдин,
Алдейи жаткан арча бешигим.
Элестеп келем, термелип келем, жашоо бешигин.

Мен турган тушта - сен туулган кыштак,
Тулпарлар туйлап, туйгундар учкан.
Жалгыз бир кезде жарк этти эске,
Жагоочон күндөр жадымдан чыккан.
Барайын дедим, бара алган жокмун,
Карарган деңиз, агарган толкун.

Тунарган жакты турамын карап,
Туш-туштан шоокум, шооладай жанат.
Бир мезгил келет жамгырдай төгүп,
Бир мезгил кетет шамалдай сабап.
Бүл дүйнө ушундай жаралган досум,
Карарган деңиз, агарган толкун.

Шамалбы, карбы, өкүнбөйм эч бир,
Кезинде жаады, кезинде кетти.
Тек гана дүйнө жазындай болгон,
Кумарлуу кездер көзүмдөн өттү.
Сенин да билем, тизмеңде жокмун,
Карарган деңиз, агарган толку

Жүрөгүмдөн ажырап,
Үзүлдү бир жалбырак.
Кеттиң менден бурулуп,
Барган жокмун жалдырап.

Кайырма:

Кантем ай, мен кантем ай?
Таарынбайм тагдыр ушундай.
Кааласаң конбойт турбайбы,
Бакыт бир тоонун кушундай.
Кантем ай, мен кантем ай?
Таарынбайм тагдыр ушундай.
Чакырсаң конбойт турбайбы,
Бакыт бир тоонун кушундай.

Сүйүүм менен бирге өскөн,
Гүлдөй болуп мен сынам.
Ыйлап, сыздап "кетпе” деп,
Сени кыйнап не кылам?

Кайырма:

Талкалап баарын бүттүң,
Эң назик көңүлдөрдү.
Текебер мүнөзүңө,
Үмүттөр көмүлгөнбү?

Кайырма:
Жүрөктөр сенсиз кагып,
Ыйлады дагы, дагы.
Кол шилтеп кете бердим,
Кош эми сүйүү багы.

Мурдагы жакшы көрүү,
Жашабайт сезимдерде.
Кайрылып келбейм сага,
Көз жашың төгүлгөндө.

Кайырма:

А азыр башка менин,
Жанымдай сүйгөн жарым.
Түбөлүк коштошомун,
Мени эстеп кайгырбагын.

Кайырма:

Капилет сен карасаң, мен да карап,
Каректе сезимдердин оту жанат.
Көктөмдө жайнап чыккан кызгалдактай,
Көңүлүм сүйүп калган сыяктанат.

Кайырма:
Махабат тунук мүрөк,
Махабат сүйгөн жүрөк.
Маанисин билген жандар,
Мазмундуу өмүр сүрөт.
Махабат тунук сезим,
Махабат туура чечим
Мен бүгүн махабатка,
Мас болуп турган кезим.

Жанашпай бакытыма азыр ылдам,
Жаныңа жакындаймын акырындан.
Жанымды сыйкырлаган сымбатыңды
Жашаймын чыгарбастан акылымдан.

Ээлеген эрке жел чырайын,
Энчилеп алууну сурайын.
Көп күндү уйкусуз өткөрдүм,
Болсо деп келечек жубайым.
Издеп бактымды жолуңду карагам,
Арылбай муңдуу санаадан.
Түшүмдө билсең колуңду кармагам,
Ал түштү ойдо сактагам.

Кайырма:
Жанымдай сезилесиң сен мага,
Теңи жүрөктүн өзүң тек гана.
Жаңылбай убакыттар өтсө да,
Болсунчу биздин жолдор бир гана.

Махабат кемеси сүйүүнүн,
Бир болуу - түбөлүк үмүтүм.
Ааламдын ажарын атайын,
Арнагым келет бир сен үчүн.
Издеп бактымды жолуңду карагам,
Арылбай муңдуу санаадан.
Түшүмдө билсең колуңду кармагам
Ал түштү ойдо сактагам.

Кайырма:

Сайраган булбул тилиндей,
Көшүтүп көзгө илинбей.
Жаш кезиң өтөт турбайбы.
Жадырап-жайнап билинбей.

Селкилер менен алышып,
Бозойлор менен жарышып.
Жүргөн кез түшсө эсиме,
Жүрөгүм кетет сайышып.

Чечедей болуп кадала,
Чыкпайт го ал кез санаада.
Чачымды бурул басса да,
Картайтпайт мени замана.

Мейли атак, мейли байлык жыйбасам,
Мен өзүң деп дүйнө кезип ыр жазам.
Мелмилдеген дайра, деңиз суу кечип,
Мелмелжиген далай, далай кырды ашам.

Кайырма:
Сени сүйүп, сен деп күйүп ыр жазам,
Сергектенем сен жөнүндө ырдасам.
Сезимдерге тынчтык бербейт жүрөгүм,
Сени көрүп, сени карап турбасам,
Кагылайын каражаным, кайда жүрдүң мурдатан?

Менден катып жамалыңды бурбасаң,
Мен сендикмин, кайдигерлик кылбасаң.
Мерез болбо, кеч болсо да жолуктук,
Мени ая, ак сүйүүңдү сыйласаң.

Кайырма:

Жагалданып, жалбарганым кыйбасаң,
Жан дүйнөмө кантем анан сыйбасаң?
Жаралгандай бир өзүңдөн бүт аалам,
Жалгыз сага жүрөктөгү сырды ачам.

Кайырма:

Көлдүн жээги, бирге бастык салкындап,
Жайдар мүнөз, жаз гүлүндөй жаркылдап.
Жумшак шамал бетти аймалап сыласа,
Майда толкун жээкке урунат шарпылдап.
Кошкун дедиң көпкө карап, кол булгап,
Кете бердиң пароходдо калкылдап.

Эми алысмын, куса болуп, сагынып,
Бирок дайым бирге жүрөт тамашаң.
Түбөлүктүү өмүрүмдүн шериги,
Сени сүйүп, жалгыз сени жаратам.
Ашыктыгым ого бетер артылат,
Сагынганда сүрөтүңдү карасам.

Ар бир кыял, мүнөздөрүң көңүлдө,
Унутпастан ойлойм өзүң жөнүндө.
Сары алтын дейт түбү келип сабырдын,
Сагынуунун зардабына жеңилбе.
Аз күн калды жолугушчу убагы,
Сен узаткан Ысык-Көлдүн жээгинде.

Гүл жыттуу кызга ашык кандай кыйын,
Жадырап көрсөткөн бар, урмат-сыйын.
Апкарып маңдайымда турсаң дагы,
Сезилбейт бүт түйшүгүң, тунук сүйүүң.

Кайырма:
Махабат отун чындап чачасыңы?
Сезимге тунук күчүң катасыңбы?
Билбеймин мен да сенин сырларыңды,
Абайлап, арзып билбей жатасыңбы?

Сагынып жүзүңдү мен көргүм келет,
Мен сага асыл ойду айткым келет.
Мас болуп, ак сүйүүңө мен чөмүлүп,
Сүйүүмдөн махабатты тапкым келет