Кыргыз спортчусу Иззат Артыковду жердештери салтанат менен тосуп алышты (фоторепортаж)

Бүгүн, 12-августта "Рио-де-Жанейро-2016" Олимпиадасында коло медаль тагынган оор атлетчи Иззат Артыков баштаган топ жергебизге келип түштү. Аларды жердештери салтанат менен тосуп алып, гүл карматышты.

Медаль ээсин тосуп алуу иш-чарасында анын достору, жакындары, Спорт агенттигинин, Бишкек мэриясынын өкүлдөрү болушту. Спортчу өтө толкунданганын, кийинки Олимпиада оюндарында алтын медаль алып келүүгө аракет кыларын баса белгиледи.

Андан тышкары мушкер Эркин Адылбек уулу, оор атлетчи Жаңыл Океева жана сууда сүзүү мелдештерине катышкан Дарья Таланова менен Денис Петрашов сыяктуу спортчулар кайтып келишти.

Учурда спортчулар өлкөбүздүн желеги тагылган 5 унаа менен Бишкек шаарын көздөй бет алышты. Алар шаардагы Жибек-Жолу көчөсүн, Манас кең көчөсүн, Түштүк магистралды, Абдрахманов, Чүй, Тоголок Молдо, Фрунзе көчөлөрүн кыдырышат.