Өлкөдөгү ири базарлардын өкүлдөрү журналисттерди такталган гана маалыматтарды таратууга чакырды

Өткөн аптада "Азаттыкка" "Кыргызстандан чыгарылган миллиондордун изи" деп аталган видеоматериал жарыяланган. Бүгүн, 3-июнда ал маалыматты "Калп, такталбаган" дешип "Дордой", "Кара-Суу", "Мадина" базарларынын өкүлдөрү маалымат жыйын өткөрүштү.

Алар белгилегендей, маалымат жыйындын максаты - журналисттерди такталган маалыматтарды гана таратууга чакыруу.

"Мындай фейк маалыматтарды окуган, көргөн коомчулук ишкерлер кандайдыр бир мыйзамсыз аракеттерди жасайт экен деген ойдо калат. Көрсөтүүдө Айэркен Саймаити деген адам жана "Абдыраз" ишканасы тууралуу сөз болуптур. Биз бул ишкананы да, Саймаитини да билебиз. Бирок аларга эч кандай тиешебиз жок. Көрсөтүү чыккандан кийин Саймаитиге байланышып, бул так маалыматпы деп сурадык. Ал тиешелүү документтердин баарын алып келүүгө убада берди.

Азыр болсо ортодо жөнөкөй эле эл - соодагерлер жапа чеккени турат. Дагы бир жагдай банктар эч качан мыйзамсыз акча которбойт, бардык операцияларда маалыматтар камтылат. Антпесе лицензиясынан айрылмак да", - деди маалыматтын жүрүшүндө ишкерлер менен кошо келген юрист Муса Бейшенов.

Ишкер Самат Абдурахманов өлкөдө стабилдүүлүк жок болсо башка мамлекеттер менен товар айландырып иштөө кыйын экенин белгиледи.

"Мурда кытай ишкерлери бизге алдын ала товар беришчү. Азыр болсо акчасын төлөй албай калат го деп чочулап жатышат. Бул Кыргыз өлкөсүнүн экономикасына терс таасир тийгизет. Миллиондогон адамдардын пенсия, айлыгы ишкерлер төлөгөн салыктан топтолорун эске алуу керек", - дешти маалымат жыйын өткөргөндөр.

Жогоруда аты аталган базарлардын өкүлдөрү "Азаттыкка" чыккан көрсөтүүдөн кийин аларга карата текшерүүлөр күчөп, айрым банктар акча которуудан баш тартып жатышканын да кошумчалашты. Бирок кайсы органдар жана кайсы банк экенин ачык айтышкан жок.