"Намыс" командасы "Ынтымакты" жеңип, көк бөрү турниринде чемпион болду

Кечээ, 21-мартта Чолпон-Ата шаарында көк бөрү боюнча Нооруз майрамына арналган турнирде жогорку лиганын финалдык оюндары орун алды.

Алгач "Шахтёр" жана "Алтын-Альянс" командалары кез келип 3:2 эсебинде "Шахтёр" командасы 3-орунду ээледи.

Финалда Таластын "Ынтымак" командасы менен Нарындын "Намыс" командасы кез келди. Командалар оюндун 3-бөлүгүндө тең чыкканына байланыштуу кошумча убакыт берилип, натыйжада теңир-тоолуктар алтын салымды салып, турнирдин жеңүүчү аталды. Ошентип эсеп 4:3 менен "Намыстын" пайдасына чечилип, команда 1 миллион 500 миң сом утуп алды.

Нарындан чыккан команда жогорку лигада алгачкы жолу чемпион болуп отурат. Буга чейин жогорку лиганы бир нече жолу жеңип келген "Ынтымак" командасы бул ирет 2-орунду алып калды. Бул лигада дагы бир күчтүү команда "Достук" оюндан четтетилген болчу.