Orion кемеси Айды айланып, Жерге кайтуу жолуна түштү

АКШнын NASA агенттигине таандык Orion космостук кемеси төрт астронавт менен Айды ийгиликтүү айланып чыгып, Жерге кайтуу багытын алды. Бул тууралуу чет элдик басылмалар жазышты.

Маалыматка ылайык, 7-апрелде кеме Айдын гравитациялык таасиринен чыгып, андан 66 миң чакырымдан ашык аралыкка алыстайт.

Бул миссия дүйнөлүк космонавтика тарыхында маанилүү окуя болуп калды. Экипаж космосто болуп көрбөгөндөй аралыкка – Жерден 406 миң 764 чакырымга чейин алыстап, пилоттолгон учуулар боюнча жаңы рекорд жаратты.

Аталган экспедиция – Artemis II миссиясы – акыркы 54 жылдагы Айга багытталган алгачкы пилоттолгон учуу болуп калды. Мындай миссия акыркы жолу Apollo program алкагында ишке ашкан.

Кеме 2-апрелде АКШдагы Cape Canaveral космодромунан Space Launch System ракетасы аркылуу учурулган.

Белгилей кетсек, Artemis II миссиясынын ийгиликтүү аякташы кийинки этап – Artemis III үчүн маанилүү негиз түзөт. Анын алкагында адамды кайрадан Айдын бетине кондуруу пландалууда.