Японияда куш тумоосунан улам 230 миң тоок жок кылынат

Япониянын түндүгүндөгү Аомори префектурасынын бийлиги куш тумоосунун очогу аныкталгандан кийин 230 миң тоокту жок кыла баштады. Бул тууралуу Kyodо агенттигине таянып эл аралык басылмалар жазышууда.

Маалым болгондой, жергиликтүү 32 канаттуулар фабрикасынын айланасында карантиндик зоналар түзүлдү.

Бийлик оор экономикалык кесепеттерге алып келе турган илдеттин андан ары жайылып кетишинен кооптонууда.

Мисалы, 2023-жылы канаттуулардын тумоосунан жапа чеккен тооктордун жапырт жок кылынышы Японияда жумуртканын баасынын кымбатташына алып келген. Ошол учурда Токионун кээ бир супермаркеттеринде бул азыкты сатып алууга чектөөлөр киргизилген.