Казакстан Израилге санариптик технологиялар жаатындагы жетишкендиктерин тааныштырды

Казакстан президенти Касым-Жомарт Токаев жана Израил президенти Ицхак Герцог Астанадагы эл аралык жасалма интеллект борбору Alem.ai менен таанышышты. Бул тууралуу Tengrinews.kz басылмасы Акордага шилтеме берүү менен билдирди.

Иш сапар учурунда тараптарга борбордо жасалма интеллект технологияларын өнүктүрүүнүн толук цикли ишке ашырылып жатканы көрсөтүлдү, ал таланттарды эрте аныктоодон тартып, аларды даярдоого жана ЖИ чечимдерин дүйнөлүк деңгээлде жайылтууга чейин камтыйт.

Ошондой эле Ицхак Герцогго Казакстандын санариптештирүү жаатындагы жетишкендиктери жана жасалма интеллектти экономика менен социалдык тармактарга киргизүү боюнча долбоорлор тааныштырылды. Президенттерге “Astana Smart City” долбоору да көрсөтүлүп, ал заманбап акылдуу шаар инфраструктурасын түзүүгө багытталган ири демилге экени белгиленди.

27-апрелде Ицхак Герцог Астана шаарына расмий сапар менен келип, салтанаттуу түрдө тосуп алынып, ошол эле күнү Касым-Жомарт Токаев менен тар жана кеңейтилген курамда жолугушууларды өткөрдү. Анда эки өлкөнүн саясий жана экономикалык кызматташтыгы талкууланып, Токаев эки мамлекет ортосунда олуттуу жылыштар бар экенин белгилесе, Герцог кызматташуунун өнүгүшүнө канааттануу билдирип, Казакстандын эл аралык демилгелерин колдой турганын айтты.